顯示具有 ♥生活雜記♥ 標籤的文章。 顯示所有文章
顯示具有 ♥生活雜記♥ 標籤的文章。 顯示所有文章

2015年11月29日 星期日

【優惠】Microsoft Store 冬日狂賞! 送旅遊現金券高達$1,000

如果你本身有打算買手提電腦、遊戲機Xbox、Office軟件等,又好鍾意去旅行,咁就啱喇!

最近新加坡航空(Singapore Airlines)同微軟(Microsoft)合作,凡於微軟(Microsoft)MS Store 網上訂購任何產品超過港幣$3,000,即可獲得新航假期(SIA Holiday)的現金劵價值HK$500;買$7,000,就可以獲HK$1,000,多買多送。首100名惠顧滿HK$7,000的顧客仲可以額外獲得500星航KrisFlyer miles飛行里數。優惠只限網上訂購架乍!門市並不適用。

點解舊年冇依個優惠架T^T

優惠期: 即日起至到 2016年1月3日
訂購網址: http://bit.ly/1PXoplu 

2015年11月17日 星期二

今次真係復活喇!

AABB復活喇~2014年休息了差不多一年,成個人冇晒朝氣,旅行照去,但冇晒心機寫Blog,好似抑鬱咁。去年中試寫一排,寫寫下又停左。最近重拾返寫Blog嘅興趣,真係的起心肝寫,補寫完去年台灣遊記。為左連貫d,文章嘅日期承接住2014年繼續落,唔想d讀者睇睇下2014年,突然Day3跳左去2015年,好似好怪咁。睇返以前嘅產量,每年平均都有百幾篇Blog,但2014 & 2015年近乎零,好似消失左咁。

我會加油架喇!希望遲到好過冇到啦。
在此我要好好多謝K先生,非常感謝你,沒有你的支持,可能B小姐有排都企唔返起身。嚟緊會盡力寫多d文,唔敢Promise速度,但我會Try my very very best!


引用一張舊畫作鼓勵自己

充滿鬥志的B小姐上

2015年10月24日 星期六

新居買床褥記

很快便搬新居,在考慮該買哪一款床褥。
咁啱今期《選擇》月刊講床褥,正呀!

朋友介紹海馬,亦有人講金美夢,聽講雅蘭都唔錯,睇完消委會做嘅測試報告之後,我地最後買左宜家IKEA嘅【HYLLESTAD 獨立袋裝彈簧乳膠床褥, 特級承托】由而家至10月26日做緊優惠床褥有85折,折左之後5呎售價$4326.5。

揀佢嘅原因係:

2015年10月14日 星期三

消失了的灣仔「飯堂」

B小姐好為食,對食有一點要求,雖然自問唔係咩專業食家,唔識好似蔡生咁用好豐富嘅形容詞來描述d食物,但舌頭最誠實,好食就好食,唔好食就唔好食,冇下次。多年來累積了心目中的「飯堂」List,試過好食會翻兜,仲會介紹俾朋友。

自2010年起五年來一直都在灣仔返工,見證著這區的食店變化&興衰起伏。睇住好味的飯堂執了一間又一間,真係好心酸......最初係在地鐵站隔離的嘉華茶餐廳,裝修好陳舊,睇佢個樣都應該做左好多年。佢個早餐同午餐都好抵食,最愛佢的肉餅飯餐,夠正氣又有住家飯嘅感覺,自從佢執左之後暫時都搵唔到代替品,好可惜。後來在某次機緣巧合下,找到友膳坊,係蘭杜街一間標榜全無味精嘅小菜館,佢個每日老火例湯真係令人回味,迅速成為中式飯堂首選,可惜丫,今年都頂唔住執左,可能該區鬼佬多,唔鍾意食中餐啦。三滝海鮮刺身丼專門店,我&同事都一致認為佢係灣仔最好的日式刺身飯便當專門店,唔記得2011定2012年開,刺身飯由$5X蚊至$7X蚊,便當包裝精美,壽司飯軟硬及酸度適中,刺身非常新鮮,後來加價加到$6X蚊起,仍然覺得物有所值。跟住係一間壽司店,叫Yuyu Sushi,位於灣仔船街,係一間好出色嘅壽司店,魚生新鮮,款式特別!自從試過一次之後便愛上左,大時大節喜慶日就會去幫襯,每次水準都Keep住,店員又友善親切。記得最後一次幫襯係2013年中,果次食完臨埋單,個店員話好彩你嚟得早,下星期我地唔做喇。「下?唔做?係執定搬呀?」「我地會搬呀,搬去中環」「中環邊度呀?」「近威靈頓街果頭」聽到佢搬真係好可惜呀......咁以後灣仔去邊度食壽司呀?不過都好彩係搬啫。今日突然想食壽司,上Openrice搵下香港區的壽司店,見有d Comment好好,但係好多都係新晉食家、入門食家寫,有d假假地......當一個平台變得商業化,公信力就會大大減低。即係好似果d乜乜頒獎禮,乜乜乜十大最佳乜乜食店等等,都係Marketing作怪。唔係一定唔好,可能間公司只係透過依d方法而令更多人知道佢嘅好,只不過未必係真「十大」囉,可能有更多用心經營嘅小店沒有budget宣傳,堅持默默做好本份。每當遇上了這些「清泉」心裡就會覺得好感動,同埋希望佢地可以繼續做落去,唔好執,please!

曾經聽過一句說話:「真正好味嘅食店只會在朋友間口耳相傳」,本人很是認同。如果信網上平台,不如信朋友。

好喇,聽我發完一輪up風,都只係一時間有感而發啫。仲未諗到今晚食乜好......(sad)
下一回談論下灣仔嘅拉麵店先。

2014年11月9日 星期日

又又近況

有關近況,報告完一次又一次,連自己都感到羞愧......這一年的確發生了很多事,以為已經完結了,誰知又殺出個程咬金,情緒反覆無常,身心疲累是真的。曾經有個念頭關閉這裡,但是無論發生甚麼事也好,畢竟 AABB Happy Travel 是我六年來的心血結晶,親生骨肉,又怎捨得呢?

小妹只是一個普通女子,私人事暫不交代了,過去就由得它過去吧。人生有許多東西都不能控制,我們能做的就是盡心盡力,努力地前行,努力讓生命開出燦爛的花。這裡不會關閉,我會努力繼續經營下去的。

這幾個月旅遊了許多地方,斯洛文尼亞,塞浦路斯,希臘,計埋台灣之旅及越南之旅的旅遊Blog債,不知要寫到何時才能寫完。


<<我們的愛情,是你路過的風景>>

身處在異地在認路的我太過膚淺
不知道 計算到再準方向都會有變
而歐洲的星空仍舊肯閃
餘程又哪怕 再遇險


加油!B小姐

2014年7月7日 星期一

重新出發!

重新執筆寫作這念頭,在腦海出現過許多次,然而只是一直也提不起力量去做。感謝您們的關心,我沒事,只是有點累,想休息一下。這段期間,哥哥的歌聲醫治了我的心靈。

張國榮 《我》(國)

作詞:林夕
作曲:張國榮

I am what I am
我永遠都愛這樣的我

快樂是 快樂的方式不只一種
最榮幸是 誰都是造物者的光榮
不用閃躲 為我喜歡的生活而活
不用粉墨 就站在光明的角落

#我就是我 是顏色不一樣的煙火
天空海闊 要做最堅強的泡沫
我喜歡我 讓薔薇開出一種結果
孤獨的沙漠裡 一樣盛放的赤裸裸

多麼高興 在琉璃屋中快樂生活
對世界說 什麼是光明和磊落

這數個月完成了幾個旅程,最特別的莫過於最近的「帶媽媽去旅行」系列。熱愛旅遊的我們,自由行自己Plan很容易,因為吃甚麼玩甚麼都很隨心,我們不介意辛苦、轉折,能省回一千幾百,兜遠一點路,咪當細看沿途風景囉。但是跟母親大人去旅行不同,無論住的、吃的、買的、玩的,也要經過精心挑選,先諮詢她的意願,務求她有「五星級」的享受。這個「五星級」,並不是嘆世界那種「甩殊Wee」的豪華,而是貼心,為她度身訂造的旅程。

自從去年開始,我承諾每年最少帶母親去一個地方旅遊,朋友說我孝順,說來真慚愧,「出嚟行」咗十年,現在先開始帶媽媽去旅遊,遲唔遲d呀你?但有心唔怕遲,從前年紀小沒有能力,現在有能力了,希望趁媽媽仲有力氣,盡量帶她看多一點這個世界。如果她不介意,我是絕對願意的。

這個旅程的地點是媽媽選的,作為環球世界之旅第一站,算是簡單。托賴母親大人玩得非常盡興,更斷言說:「我以後都唔跟團去旅行Lu!原來自由行好玩咁多!」玩得開心就好了,和母親大人去旅行,鬧出不少笑料,這次旅程又發生了許多奇妙的經歷,實在過癮。剛回來,她已期待著下一個旅程了,我也期待著,心情還有點興奮!


2014年6月12日 星期四

近況

這陣子,我的blog好像停頓了一樣......其實不止我的網誌,連我整個人,我的生活,我的作息,都完全混亂了,就像宇宙未爆發之前的情況,一片混頓的狀態,好恐怖!

這段期間,所有曾在Blog、Facebook、或Email留過言給我的朋友,在此我要對你們說聲對不起,我回應太慢甚至乎錯過留言,我對不起你們,也對不起我自己。

「混頓」的形成,包括工作、家庭、感情、朋友、自身,好多好多複雜零碎的小事加在一起,令我自動封閉自己,對所有事情失去動力,沒有心機做。除了上班的事情身不由己,一回公司便像機械人一樣「自動波」100%投入工作,放工後已疲累不堪,沒能力再思考其他事情。

從來我都是很正能量的人,負面的東西不去想更不會說,但如今我快要倒下了,想藉著這小小空間舒發一下,希望大家體諒!請再給我一點時間,我會努力去自我修復過來,然後再把那個熱愛分享、熱愛生命的B小姐帶回來。謝謝各位。

2014年4月7日 星期一

朋友,我當你一世朋友!

201447日,今天是生命中值得紀念的一日。原因並不是因為我剛買了一個新的電熱水壺,而是因為在電話中WeChat程式裡說話的傻婆。

大專時期,我於西餐廳裡兼職,認識了賢淑聰慧的S小姐。她做事勤快認真,工作時候不是太多話,但是她是一個對朋友非常好的人。我們家住同一區,偶爾會時常一起上下班。我們都愛芝士蛋糕,曾一起交流整甜品的心得。同時因為電單車結緣,我們試過一起在清水灣公路飛馳,雖然不常見面,但我倆就是臭味相投。

後來她去了法國流學,我們亦有透過書信及電話維繫感情。她去了瑞士實習完畢,及後去了歐洲旅遊,她在每個地方遊覽後都買了一份手信送給我,其中令我最深刻及我最喜歡的就是Triangel公仔,我一個,她也有一個。是巧合麼?得了Triangel之後我們都各自找到了現在的另一半。

2014年2月4日 星期二

深水埗「桂林夜市」(農曆新年限定)

大年初一,當我拜完年回到深水埗,一出地鐵站驚見超多人,成條桂林街變左小食街,人山人海,小食種類超多,連Kebab同印度烤餅都有,勁!我立即忍唔住拍下一張照片上載至Facebook,巡視一圈之後就回家。

人生人海的深水埗桂林街

2013年10月9日 星期三

去日本?停一停,諗一諗

其實......自從311以來,一直想寫這篇好耐好耐,但一直不知從何下筆。
(以下都是本人的心聲,如果你是日本的死忠Fans,如有得罪請多多包涵,不喜勿插。)

我作為愛香港、愛地球的人類,我認為我有義務將這些重要的資訊分享給大家,因為你們都有權知道的。本人十分欣賞日本人的優質品得教育,不能否認,他們的公民教育是做得很好:有禮貌、做事有條理、有誠信有交帶。工作上我也曾認識不少日本朋友,我也十分喜歡和他們合作。但是,他們國家現正發生的種種,是絕對對全球做成嚴重的威脅!

根據日本官方數字表示,日本一直是台灣人No.1熱愛前往旅遊的國家,我估No.2捧場客,應該是香港人了。因為低廉旅費的吸引,大家便把之前的恐懼忘記得一乾二淨。香港人就是善忘的,仍然很多人不怕繼續前往日本旅遊。可能好多人會說:
「車,如果真係幅射全地球人都死架啦,點驚得咁多」
「之前check過都話冇事啦,只係大家太杞人憂天」
「XX距離福島咁遠,冇事嘅」
「如果真係流左入海,邊度食魚都有事啦」

大家說以上這些話之前,有沒有認真了解過311究竟是甚麼一回事呢?
背後的真相又是否真的那麼簡單?



2013年8月31日 星期六

再見,Yahoo Blog

今日同友人回到家,打開 facebook,,駭見「Yahoo Blog 將要執笠」的消息瘋傳。
我多麼希望今天是愚人節



其實我知道這個消息,心裡是非常非常傷心......
立即要開返首 ”每當變幻時" 嚟聽下,頂!好應景......

雖然我明知依一日始終都會來臨,要走的始終都會走,逝去感情如何留得住,半點痴情遺忘殊不易,更多悽悽慘慘的遭遇,我不知道......
但我真係接受唔到「呢一日」竟然咁快......

2013年8月6日 星期二

大坳門上的銀河

B小姐自從買了一部微單眼之後,開始享受攝影的樂趣。
雖然技巧非常幼嫩,都是亂來,但每次完成一張自己覺得滿意的相片都很有成功感。
尋日天清氣朗 (其實這幾天都係),跟一班志同道合的新朋友一齊去影銀河

放工趕去將軍澳,快速食個便飯之後就打的入西貢大坳門。
一到達,wow!抬頭望即看見滿天星斗,已經好耐冇在香港見過咁靚嘅星空了。



自小對星空有一份「情意結」,特別是流星、銀河,令人著迷!
可以靜靜地看星其實是一件很幸福的事情。

2012年6月15日 星期五

我的第一部烏克麗麗 (Ukulele)


新玩具: 我的第一部烏克麗麗 (Ukulele)

Ukulele 是夏威夷小結他, 台灣人稱之為烏克麗麗, 因讀音相似。
體積比結他小好多, 而且只有四條弦, 輕巧易彈!

今天買了一部傳統的高音 (Soprano), 屬最小的size, 全長21吋。

買回家便急不及待拿來把玩, 看譜自學, 已經學識了幾個key的chord:
C, G7, Am, F, Em, G, A7, 可以彈幾首歌了~
嘿嘿, 我的悟性好高呢, 哈哈!

最難是G7 & G, 手指位比較難按, 不太習慣!
最易的是C, A7, Am, 都只是按一粒而已。

彈了兩個鐘, 彈到手指好痛, 要多於練習, 第日街頭賣藝賺旅費都是靠它了XD




2011年9月15日 星期四

筆電keyboard壞了(上)

筆電keyboard壞了(上)



寫依篇文章o既原因, 係希望幫到更多有需要o既人。
唔知大家有冇試過壞keyboard呢?


話說我有部netbook HP mini 210個keyboard壞左幾粒制, 「2」「W」「S」「X」, 按極都冇反應~ 初初以為係中毒/software壞, 後來發現應該係hardware壞...
都唔知點解會咁, 係咪入水? 唔知呀...
最慘係依幾粒制我成日都用, 搞到唔整唔得...
好衰唔衰部電腦剛過左保養T^T...
打去HP問, 其實都預左筆錢出o黎整, 諗住問下整幾多錢, 如果幾百蚊都由佢啦
點知佢話如果過左保養, 拎上維修中心佢會收$700檢查費先, 然後check過有咩問題, 再出報價單報實零件及維修費!
如果check過之後零件及維修費係$1000, 佢就會減返之前果$700, 即係實俾$300, 如果少過$700, 就在檢查費內扣, 但唔會退返餘款俾你。
~_~即係o徒氣! 如果壞幾粒制要俾成千蚊, 我不如買過部好過...



朋友建議我可以買個外置keyboard, 唔係唔work, 不過買netbook都係為左方便貪佢機仔細細, 如果額外加多件「行李」, 下下帶出街都幾唔方便...
另一個方法, 就係去高登/黃金搵人換, 好似幾百蚊有交易。
但我又擔心另一個問題...萬一佢地偷龍轉鳳咁點? 最怕佢換走晒入面o既零件俾返舊野我...



後來, 無意中俾我發現網上有一間商店有notebook/netbook keyboard賣, 價錢平, 而且仲教埋你點換tim! $189包郵, 比我預期平成截呀!

創奇直銷中心的阿Ken好好人, 佢仲send埋HP mini 210的拆裝短片俾我!

HP Mini 210 LCD Screen Replacement
http://www.youtube.com/watch?v=5wquYuEXokY



另外我從網上找來「換keyboard教學」/「如何拆筆電鍵盤教學」, 都幾有用
http://www.insidemylaptop.com/remove-replace-keyboard-sony-vaio-vgn-c-series-laptop/
http://www.laptoprepair101.com/laptop/2007/08/30/removing-replacing-laptop-keyboard/
http://www.laptoprepair101.com/laptop/2007/03/20/key-fell-off-keyboard/
http://www.youtube.com/watch?v=gVVJPjmGI6c

我未俾錢佢就出貨先, 效率認真高!
收到之後我會嘗試自行更換, 我會影低整個換keyboard過程, 下回再續。



2011年4月18日 星期一

新台中旅遊書!




好耐之前, 有間出版社問我可唔可以借出台中的旅遊相片版權,
佢地會送返本書俾我地以示答謝。事隔幾月, 我今日, 終於收到本書喇\(^o^)/

好開心, 本書印刷好精美, 裡面o既資料亦非常詳盡!!!!!!
雖然我冇份寫, 但係我都要忍唔住幫手介紹一下~

望著漂亮的圖片, 詳盡的旅遊攻略, 不禁令我回味返台中遊的快樂時光~
拿起書本, 好想而家就再去一次台灣!


相片授權提供, 係由無數個單位合力慷慨解囊,
AABB有幸成為其中一個, 真係覺得好榮幸, heehee~
如果大家對依本書有興趣, 就去各大書局搵下啦~~


書名: <<優悠活力闖蕩Easy GO! - 台中>>
作者: 高俊權
出版社: 跨版生活
定價: HK$68 NT$340
http://hk.myblog.yahoo.com/crossborder-book



2011年3月18日 星期五

3.11世紀大災難後有感



自從「3.11 世紀大災難」之後, 我的心情一直未能平伏......

每天從傳媒中看著災情變化 - 死難者屍橫偏野﹑無數居民痛失家園﹑核電廠軸射洩漏危機升溫, 爆發史無前例的大災難......身為地球的同胞, 實在令人感到痛心......

那邊廂災情告急, 這邊廂, 香港﹑中國在牽發搶奶粉潮! 還有日本海產﹑零食﹑M巾, 通通都被搶購一空!! 不知哪裡流出遙言說食鹽可以抗軸射, 導致無知的市民紛紛搶購食鹽﹑白米, 連雞粉及豉油都唔放過! 簡直到達一個失控的地步!!!

我真的替那些自私的﹑無知的人感到羞恥, 到底日本是災區還是香港是災區?
更可笑是, 有些無良商人大量搶購貨品, 再在網上轉售圖利, 一包原價值幾蚊o既食鹽, 炒賣至$50/包, 痴晒線!!

香港人最鍾意發災難財, 沙士果時係咁, 而家又係咁, 究竟幾時先可以停止自私??

東北大地震縱然不幸,但是日本人表現出有秩序地排隊,簡直看得人目定口呆!

地震之後,日本三得利公司宣佈所有販售機免費供應飲品,只要按鍵即出飲料,便利店免費提供食品...和水,另外,在疏散過程中,人們自覺地給推著嬰兒車的父母讓路;電話公司立即開設了確認家人安全與否的專線,公眾電話全部免費。

仲有一件側聞,幾百人在廣場避震,整個過程,無人抽煙,服務員拿毯、熱水、餅乾,男人幫助女人,跑回大樓為女人拿東西。3個小時後,人散,地上沒有垃圾,一點也沒有。在向日本人祝福的同時,不得不說,日本人給世人上了一課。

日本的國民教育做得好好, 是很值得全球國家學習的
這次災難十分不幸, 造成成千上萬人傷亡, 福島核災難仍未收復, 暫時未能估計對全球有甚麼影響, 專家估計
核災難有可能要升級到最嚴重的第七級, 甚至比1986年「切爾諾貝爾」事件更加嚴重......

希望上天眷顧日本, 可以讓他們渡過難關
日本加油!

仙台﹑福島﹑岩手﹑茨城﹑千葉﹑宮城, 這幾個漂亮的地方, 永遠也會成為大家心裡面的回憶......





2010年11月24日 星期三

誓要聖誕去旅行!

自從轉了工作後...我實在非常非常忙碌!
Blog沒有時間寫, 旅行沒有時間去, 留言沒有時間覆......
今年plan了兩個旅行 - 馬來西亞避世天堂﹑上海世博, 最後都沒有實現......
真係令我感到萬分可惜!

因為轉左行, 現在的工作需要在星期六日工作, 不再是從前的五天工作週, 朝9晚6, 所以要擇日去旅行, 其實是很難的。

幸運地, 這份工作是放紅日公眾假期的, 所以聖誕﹑新年﹑復活節等長假期, 便是我的旅行目標。

向老細申請了聖誕節請假去旅行, 得到了批准, 開心得彈起。
熱門的東南亞地點: 泰國﹑台灣﹑日本﹑印尼﹑北京﹑上海都去過了
下一站想去未去過的國家: 越南 / 韓國
這幾天做了不少資料搜集, 今天和A先生到旅行社「實地考察」,
雖然我很喜歡自由行, 不過我其實不介意跟團,
可惜......太遲了......
找到的 package 或是旅行團, 一係就full晒, 一係就貴到嘔...
越南4日3夜套票要$6xxx, 首爾滑雪團5日4夜要$6xxx
全部都over晒budget!
其實聖誕節, 我預左貴, 但係冇諗過咁貴!
仲要有都係得返極少位, 好似你今日唔book, 聽日你有錢都唔洗旨意去!

budget over左, 咁我問下有冇其他地方選擇啦
布吉 / 沙巴 / 浮羅交怡 / 蘇梅......
「唔好意思呀, 依d全部都full晒喇, 而家我地賣緊新年o既package」
好灰......
難得有幾日假期, 唔通真係要在香港過?

唔得!! 我唔會放棄!
最多機票酒店分開買o既o者, 總會有辦法的!


2010年4月20日 星期二

銜接學士課程展,top-up degree的決擇

星期六去左個銜接學士課程展,其實一直都好想讀番個degree,不過我唔想讀Multimedia,想讀Business相關的Top-up Degree。
在這個學歷掛帥的年代 —— 要搵工,先要下「苦」工!冇番個degree揸手真係唔容易搵到好工。
這個學士課程展之所以吸引我,全因為一句說話「希望轉科,讀一個與副學位不同的科目」,這是我的願望。

其實course真係有好多,花多眼亂
經過一輪篩選,最後考慮以下依兩個course

University of Birmingham
-BA(Hons) Business Enterprise $65,000 (讀1年) (不可申請CEF)
www.astonhongkong.com

->1 year with 4 subjects+1 research project
->100% taught by the UK University faculty
->The degree is awarded by The University of Birmingham, ranked 22nd in the United ->Kingdom by "The Good University Guide 2010"


University College Dublin (National University of Ireland, Dublin)
-Bachelor if Business Studies (Honours) $79,500 (讀1年半) (可申請CEF)
www.kaplan.edu.hk

->歐洲首屈一指大學, 其商學院已有100年歷史
->全球首5%高質素的大學 (資料源自: 泰晤士報高等教育特刊2009)
->在全球商學院排名第37位 (資料源自: 經濟學人2009)
->在港開辦已15年

輪排名,兩間大學都在全球200名內,不過University of Birmingham排名較高,同埋快d 讀完,學費又平d。不過我本身冇商科底,我都會擔心一個問題,就係可能冇direct offer,就算真係收左都可能讀得好吃力。University of Dublin 就已經confirm左收我,因為之前有案例收過Multimedia high dip o既學生。而比較過課程內容方面,University of Dublin 都比較完整同全面,有12 subjects,同埋我sit in過佢地o既orientation,發現佢地有study guide book,咁即使完全未讀過business o既同學都可以慢慢一步一步咁去學習,感覺容易handel好多~15年經驗即係15年經驗,係唔同d o既~如果真係揀左 University of Dublin ,我會Major Marketing,因為自己對依方面有天份同有興趣d~

搵到個blogger之前讀過依個course,問過意見,得出以下回應

問:請問你係咪讀緊 University of Ireland, Dublin


-Bachelor if Business Studies (Honours) 依個course呀?



我而家諗緊報唔報依個好, 你讀左咁耐你覺得點呀? d老師教得好唔好?



答:係呀, 我覺得幾好, 教材全部包埋係學費度, d參考書好實用。 功課量適中,  功課模式可以apply番o係工作上, 老師有d比較好,

有d就講得沉悶d, so far除o左一個教師口音難聽d, 其他o既口音都好易聽。
但你要預o左佢一上堂就要連續番4-5日,

在職o既係會辛苦d。


其實計「學到野」同埋計學費「抵」讀,都係 University of Dublin 好d o既~
讀書都唔可以靠捷徑,雖然唔知點樣嘔d 學費出o黎
不過我深信讀完之後,前途同出路都會好d,所以幾辛苦,我都會捱埋佢!


2010年3月30日 星期二

垃圾留言又再肆弱!

自從返左新工之後, 我完全冇時間寫Blog!
新工作雖然辛苦, 卻令我獲益良多, 遲d有時間我會慢慢再同大家分享

最近垃圾留言又再肆弱, 用了「禁留言」的置頂post都冇用, 真係令人好火滾!!!
究竟要點先可以杜絕呢?


2010年3月2日 星期二

有獎問答遊戲「開估」


兩個星期過去了, 我要揭曉答案了!


其實這兩星期, 我不是忙溫法文, 不是忙拜年, 其實是......


忙搵工!



在這個「有份工做o下已經算唔錯」o既年代

我做左一個重要的決定---辭職


這個決定一d都唔突然, 其實我已經思考左好耐...

有好多朋友叫我騎牛搵馬做住先, 搵到工先辭職

但我卻唔係咁諗


工作就好似拍拖一樣, 唔夾就要分手

當你22歲畢業, 做到65歲先退休, 閒閒地都要做多40年,

對唔到成世都對左大半世!

所以一定要找一個Mr. Right!


我在這家公司已經工作了三年零八個月,

看著戰友一個個離開,

轉行的轉行, 轉工的轉工,

其實我一早就知這不是我的「Mr. Right」,

因為捨不得那極多的假期, 和五天工作週,

我一再猶豫, 結果就蹉跎了歲月, 一轉眼便3年了,

今天, 我終於鼓起勇氣, 踏上這條不歸路!



至於找甚麼工作, 我還沒有一個清晰的定位

不過我有一個大方向, 就是target一d「多同人接觸的工作」

因為我性格開朗, 喜歡與人溝通, 亦很喜歡服務人



我認為, 搵工要從三方面考慮: 興趣, 能力, 人工

三方面要取得一個平衡

有d人對金錢比較重視, 所以如果人工高, 能力勝任, 即使完全沒有興趣都冇問題

但d人比較睇重興趣, 最緊要做得開心! 開心, 人工低d都冇所謂


看見U magazine聘請旅遊記者, 我心情極度興奮!!!

我用了幾天時間執resume, 作文章, 寫cover letter

投了一次, 沒回音...隔星期再投多次, 都沒回音...

我知道, 興趣同性格都很符合, 能力卻未能達標......

自知語文能力水皮,

未能像專業的旅遊記者一樣可以用生動活潑的文字描寫一個景點,

所以連見面的機會都沒有...

我輸得心服口服, 不過我唔會放棄的!


我會用這幾年時間, 努力提升我的中英文水平! 還有其他外語!

在香港這個競爭社會, 光是懂三文兩語已經唔夠用!

最好識多幾種外語, 對找工作會更有用的!

除此之外, 多學幾門專長都有能提高競爭力!

終身學習嘛~


申請了幾份工作, 已經成功獲取一個offer。

份工被標籤為「辛苦工」, 相信體力上, 一定會比現在辛苦幾倍!

不過後生仔找工作要放眼未來, 不要著重眼前的利益,

反而要睇下間公司有沒有機會給你學習, 給你成長。

我會好好珍惜依個offer, 雖然人工低左, 但係我都好開心,

因為有一個全新的開始, 一步一步邁向我的光明未來!


我上路了


請大家祝我「前程似錦」^^











雖然依首歌原意係講戒毒, 但我覺得應用在人生上都好適合

陳百強 - 摘星

日出耀長路
日光過山跨嶺射到
如像我永不願停下腳步
一心與風闖悠長路

我要踏上路途
我要為我自豪
我要摘星 不作俘虜
不怕踏千山 亦無介意
面容滿是塵土

人疲倦也要踏上路途

我要為我自豪
我要摘星 不作俘虜
星遠望似高 卻未算高

我定能摘到 我定能摘到





至於個有獎問答遊戲...好似冇人估中喎^^"

所以是沒有得獎者的!

下次再努力哪~