台北之旅-Day2【獨闖西門町】

Day2 (13 Apr 2012)

食飽, 就獨個兒逛下西門町, 熟習下依度地形。

由昆明街出來沿著成都路方向行, 見到U2電影館, 裝潢時尚

再行見到老天祿, 不過唔好認錯呀! 依間上海老天祿係賣糕餅及滷味, 不過用正牌果間老天祿完全冇關係架。

正牌果間在西門町商圈內, 只得一間, 絕無分店。

今日好好天喎, 真係好喇^^

慢慢走到西門紅樓, 是一棟百年古老建築, 歷史遺產。

現已化身為創意藝術文化集中地, 每逢假日仲會有西門紅樓創意市集, 售賣年青設計師手作精品。

詳情請參閱 redhousetaipei.blogspot.com

如果唔得閒星期六日去, 平日紅樓入面都有文創平台, 售賣創意設計用品。

西門紅樓

地址: 台北市成都路10號

營業: 周日至四 11:00-21:30 (周五六至22:00)

電話: (02)23119380

休息: 周一

網址: redhouse.org.tw

接著我走到紅樓後, 看見好多餐廳, 有日式﹑泰式﹑西式﹑韓式, 夜晚依度應該好熱鬧!
 

台灣到處都可以見到依D彩劵店, 梗有一間係左近!

見到永富福州魚丸, 據說粒粒魚丸由人手新鮮打成, 再靄入餡料, 咬落去有鮮甜肉汁。

好想試下, 不過食完碗牛肉麵仲好飽, 唯有下次先!

永富福州魚丸

地址: 台北萬華區內江街43號

營業: 11:00-20:30

電話: (02)23313654

休息: 年中無休

網址: 沒有

沿住就行到西門車站。

香港人經常形容西門町是台灣版旺角, 真係好貼切。

夜晚10點幾條街仲好多人, 超多旅館, 超多商場, 超多食店。

對面係誠品116及真善美劇院, 西門町地標之一。

黃色果間蛋蛋屋在台灣好出名, 專食蛋包飯的。

隔離有間屈臣氏24小時開放, 啱晒女士夜晚去掃貨。

當日Uniqlo西門店開張, 成條街都掛滿Uniqlo的banner。

台灣好流行o既冬甩店, 高雄都見過依隻野, 影返張相留念先^^

義大利麵達人, 蛋蛋屋d friend, 不過佢專食意粉的。

到處都是這些精品店

楊記花生玉米冰

創於1960年, 至今已有50年歷史, 有別於新款冰店, 楊記只有10種冰品及糖水選擇。

最受歡的花生冰玉米冰都係選料認真, 製作用心的招牌冰品。
依條街好多「早餐店」, 台灣十分流行的早餐文化。
在早餐店, 你唔會見到火腿通粉﹑沙o爹牛肉麵﹑多士, 佢地流行食蛋餅﹑豆漿﹑粢飯﹑水煎包...等等。
台灣朋友告訴我, 他們每天都會去早餐店吃早餐, 或外帶回公司吃。
可惜B小姐無緣試試這種台式早餐。

楊記花生玉米冰

地址: 台北漢口街2段38及40號

營業: 11:00-22:00

電話: (02)23752223

伊樂園大飯店

在台灣, 到處都見到好多幾十年老店, 始創於1949年, 始創於1978年......etc
不禁令我有少少感觸...點解台灣保存依d老店可以做得咁好, 但係香港嘅老店, 卻一間又一間被地產商迫到執笠? 誰說香港冇地產霸權? 業主都係香港人, 點解下下都要向錢看, 對這些特色又小本經營的老店趕盡殺絕?

檸檬屋

是一間果汁店, 店內主打台灣招牌苦瓜汁, 白苦瓜混合左蜂蜜, 清新解渴, 完全冇苦瓜嘅苦澀味, 好好飲!

以前賣NT$30, 現已加價到NT$50/杯, 不過都仲係好受歡迎。

苦瓜有降火排毒功效, 掃完街飲一杯清下熱氣就一流喇~

除左苦瓜汁, 仲有其他新鮮果汁即叫即打, 不愛苦瓜都可以飲其他。

檸檬屋

地址: 台北漢中街21號

營業: 11:00-00:00

沿漢中街向西門町方向走, 見到三兄妹雪花冰品店, 專食刨冰﹑豆花, 甜品等。

台灣朋友話依間好好味, 不過我太飽冇試~

謝謝魷魚羹

又係40年老店, 西門町都有幾家分店。

依條街全部都係食魷魚羹, 好多唔同牌子。前年去高雄六合夜市食過, 覺得太甜, 唔只依間「謝謝」味道又係點呢?

晏少少再食, 到時再介紹。

台灣特色的夾公仔店+機舖, 入去逛逛

錄音湯姆貓, 即係TALKING TOM的實物版, hahahaha...

帶帽小雞^o^ 2年前我在台中帶機車小雞回家, 2年後俾我在台北見到佢個friend~

太可愛了, 忍唔住用左NT$10玩。夾左一次, 唔成功, 再來第二次, 都唔得><

姐姐見狀, 走埋o黎問我想要邊隻色, 然後佢將小雞放得好近出口, 再俾我試。

第三次, 終於成功喇!!!!!

哈哈, 好開心^^

隔離就係老天祿滷味店, 記住武昌街先係正牌呀!

生活工場

是台灣本土家品店, 全部 made in Taiwan, 1993年在士林創業, 而家已經開到百幾間分店。

本身好鍾逛家品店, 依度賣嘅家品質量好, 設計新穎, 感覺有D似FrancFranc, 分別在佢係made in Taiwan。

見到好多精美家品, 真係好想帶佢返屋企!!! 可惜...行李太重, 我一個人搬會好辛苦。

最後只買了兩個煎蛋模及1枝香薰油, 依度可以刷卡啊, 連AE都有得簽, 實在太開心喇^^

生活工場

地址: 台北昆明街98之1號

營業: 11:30-22:30

電話: (02)23889122

休息: 年中無休

網址: www.workinghouse.com.tw

逛完生活工場, 我已經好累了......

只係3點幾, 今晚7點半約左好友會合, 仲有D時間, 返酒店hea陣先。

幸福旅店, 分左兩邊, 右手邊是CHECK-IN LOBBY及非吸煙樓層, 左手邊係共用大廳及吸煙樓層。

酒店房間是沒有熱水壺﹑雪櫃等供應的, 要食杯麵, 就要稍易玉步到1樓中央大堂, 果度有水機及咖啡機供大家免費享用。

返到酒店, hea在床上邊上網邊睇電視, 勁爽!
順手upload幾張旅行照上facebook。

休息到5點半, 我又出去搵食!

一枝箭標左去謝謝魷魚羹, 途中經過Uniqlo, 見到sales一字排開企出來叫喊口號, 手上拿著新款悠閒服, 非常熱鬧。

 

謝謝魷魚羹

40年老店, 招牌魷魚羹做得非常出色!

魷魚羹 (NT$50/碗) 可以免費加冬粉﹑麵條吃, 不過我沒有加。不要香菜(元茜)可以同佢講。

材料好豐富, 味道超好, 淡淡魷魚的鮮甜, 魚肉彈牙有鮮味, 裡面包裹著魷魚肉爽口。

羹底不會太稀, 混合了柴魚同煮, 味道好夾, 每一口都是幸福。

謝謝魷魚羹

地址: 台北漢中街32巷1號

營業: 10:00-22:30

電話: (02)23718781

當我趕去西門町地鐵站途中, 巧遇街上一家手工草帽, 款式幾靚, 是由一位婆婆經營的。

下一篇
台北之旅-Day2【血拼忠孝敦化】

上一篇
台北之旅-Day2【好味到昏牛肉麵】