2011年7月29日 星期五

雲南之旅Day3.6 麗江大港旺寶國際飯店

Day3 30May2011(Mon)

麗江大港旺寶國際飯店

麗江入住依間旺寶係全個行程最靚o既一間!!!
永安團友仲可以專享入住永安豪華專區tim!
佢o既豪華程度及知名度, 有如香港四季半島, 無人不曉。
亦因為咁, 的士司機會坐地起價, 明明15蚊就去到古城, 佢會開價20蚊或以上。
如果天氣好, 酒店可以清楚望到玉龍雪山, 有如酒店slogan「每朝和玉龍雪山一同醒來」



2011年7月28日 星期四

雲南之旅Day3.5 麗江古城

Day3 30May2011(Mon)

麗江古城



幾時先到麗江古城的中心? 依個水車就係地標!

前文講過, 麗江古城有800年歷史, 被列入世界遺產之一!
不過隨住科技發達﹑社會進步, 曾經來過麗江o既人都話「今非昔比」!
麗江變左好多﹑古城都變左好多, 變得商業味濃, 已失去了舊日的味道...
再過多幾年, 真的不敢想像!

2011年7月27日 星期三

雲南之旅Day3.4 黑龍潭公園

Day3 30May2011(Mon)


黑龍潭公園


去到麗江之後全日一直落雨冇停過, 特別係黑龍潭公園&麗江古城, 雨下如豆大兇得像黑色暴雨警告! 本來有團友提議返酒店, 但係咁難得來到, 返左酒店休息可能聽日唔夠時間遊覽! 有人反對有人贊成, 最後我地都下車遊覽。



2011年7月26日 星期二

雲南之旅Day3.3 麗江束河古鎮

Day3 30May2011(Mon)

束河古鎮

食完飯, 我地去左束河古鎮, 係麗江其中一個出名o既古城之一。
麗江古城有800年歷史, 束河古鎮就600年!

麗江有好多少數民族, 最出名係納西族同摩梳族!
納西族o既靚仔同靚女叫法同大理好唔同,
靚女: 胖金妹
靚仔: 胖金哥

雲南人認為越肥越黑就代表越靚!

當地o既小數民族特別鍾意戴眼鏡o既胖金哥,
因為佢地覺得戴眼鏡代表有學識, 可以在家相妻教子。
結婚時女家會給男家送禮, 普通就送8頭牛, 如果戴眼鏡就會送16頭牛!

在雲南係母系社會, 男人係完全唔洗做野的!

最多都係畢業後出來社會工作3年, 吸收下社會經驗, 跟住就可以在家享福。
如果有戴眼鏡o既胖金哥, 可獲減免, 做少一年野, 即係只做2年就得喇!
團友個個聽到嘩嘩聲! 不過要入贅就唔係人人都願意~


來到束河古鎮, 活動是坐馬車

2011年7月25日 星期一

雲南之旅Day3.2 離開大理 前往麗江

Day3 30May2011(Mon)

離開蒼山, 我們起程離開大理。
由大理去麗江, 車程一共是4小時, 可以好好瞓一覺。



2011年7月24日 星期日

世界最奇特的機場



當我看到依幾張相的時候......我心裡不禁疑惑, 這是真的嗎 ?????

因為歷史地理條件的限制,直布羅陀把機場跑道和馬路混合 ​在一起~
是全球極罕有的,成為世界最奇特的機場 !




2011年7月20日 星期三

A202開學, 新老師François

話咁快又開學, 時間過得真係好快!
上一期唔洗考試直升, 即係......今期要考試呢~~

新學期, 有不少同學因為唔同原因暫停一期, 同事亦加入了許多新同學~
班中約有11~12個學生, 6個係舊同學, 都幾熱鬧!

老師方面, 本來又是Joelle教, 不過因為她要帶遊學團, 所以由François代課, 直到8月中。這個新老師幾好, 說話清楚容易聽, 而且他十分生鬼, 很多body language, 令到我們很容易明白。



已經上了兩堂, 今天是第三堂, 很喜歡這個老師呢~~^^



2011年7月13日 星期三

雲南之旅Day3.1 大理索道上蒼山

Day3 30May2011(Mon)

坐索道上蒼山

今日第一站係去蒼山, 跟住就坐4個鐘頭車去麗江。
中途有個自費景點, 叫觀音峽。導遊極力推薦依個景點, 話山明水秀, 風景優美。
如果大家都同意去, 就會在該景點停留1小時, 順便食埋飯, 咁大家就唔駛坐4個鐘車咁辛苦。其實我地都幾想去, 不過有部份團友唔想, 所以最後都冇去到。



2011年7月12日 星期二

雲南之旅Day2.6 蝴蝶之夢

Day2 29May2011(Sun)

蝴蝶之夢


食完飯, 我地出發去睇表演。「蝴蝶之夢」在大理好出名, 係一個大型o既歌舞表演。不過依個項目行程唔包, 自費200蚊人仔, 都幾貴。

2011年7月11日 星期一

雲南之旅Day2.5 風花雪月大酒店

Day2 29May2011(Sun)

風花雪月大酒店

下晝4點半, 我地先去酒店休息, 夜晚再出去。
係呀, 導遊知道我地今朝辛苦, 所以有「午睡」時間, 哈哈。



大理入住的是風花雪月大酒店, 係一間由四合院設計的, 市內唯一一間五星級酒店。

2011年7月10日 星期日

梅窩3天遊 Day3 沙灘摸蜆族

第3日, 要 check-out 離開了。
總括3天感想, 梅窩係一個值得再來o既地方!
因為依度寧靜, 沒有南丫島及長洲般熱鬧, 又能享受渡假風情。
銀礦灣酒店亦很好, 無論設施的價錢都令人滿意。
依度好好hea, 周末來渡個小假也好。

走的時候, 看見沙灘變成另一個樣, 看來是潮退了!
沙灘的石塊露了出來, 拍出來的畫面很美。


有許多人在摸蜆




若然我有時間, 我都好想去「摸」埋一份



再見了, 小梅窩, 我會再來的~

((完))



梅窩3天遊 Day2.2 銀礦灣沙灘

天氣報告話星期六日都會落大雨, 好彩去完大澳返o黎都未落。
我地趁個天仲光, 拿拿臨換泳裝去沙灘玩!


沙灘唔係太多人乍


沙灘中間有條小小河道






小小河道原來有好多魚仔,
好難先捉到一條, 你地發唔發現到呢?




天色好似唔多好, 睇o黎就快落雨






開始落雨粉了


於是我地慢慢行返岸邊


禁止擕犬隻入內的沙灘, 來了兩位不速之客


仲玩得好開心tim, 哈

過多冇耐, 就開始落大雨了!
謝天謝地, 到依個時刻先落已經賺左~

本來諗住出街食, 不過實在太大雨了...
結果我地返酒店食依個
國際美食BBQ自助晚餐


只限星期六 HK$268




靠近窗旁的枱已被預約了, 我們只好坐其他。
餐廳環境真係好好, 香港好少有海景酒店餐廳, 建在沙灘旁更少,
同女朋友o黎拍拖一流, 唯獨欠缺美食。


話明係海鮮自助餐, 不過海鮮款式唔多, 而且味道都好一般甚至麻麻

其他熟食就唔好講, 真係冇咩好食!
依個價錢唔太值, 似係食環境多~


BBQ食物方面, 蝦算係燒得唔錯!
仲有帶子同栗米都ok

埋單發現有8折, 因為連住2晚o既關係, 如果住1晚就有9折。
依度個buffet真係好難食...建議都係出返去食大牌檔好~

梅窩晚上好寧靜, 酒店張床又幾舒服, 所以2晚都睡得香甜~~

((待續......))



2011年7月9日 星期六

梅窩3天遊 Day2.1 大澳漁村風情


B小姐同A先生都未去過大澳, 所以難得在此逗留3日2夜, 我地就去左大澳玩。


在碼頭對出有個巴士總站, 你會找到前往大澳的車


原來1個鐘頭先一班車, 我地真係超Lucky!!!

今日天氣好好, 搭巴士沿途見到好多漂亮風景!
最鍾意望到一片綠油油, 偶爾仲見到有牛tim!


A先生唔講我都唔知依度係監獄o黎, 咁靚o既?

唔覺唔覺, 原來搭左成粒鐘! 好彩我地唔趕時間, 放假就係咁架啦~
到左大澳, 就望到d西貢/香港仔都望到o既漁船。




一落車, 漫無目的, 見到有個哥仔問我地睇唔睇海豚
我唔知大澳有海豚睇個喎, 幾多錢呀? 20蚊/位 坐幾耐呀? 10分鐘左右
阿哥仔話趁而家水退就有得睇, 過多陣水漲就睇唔到
係真唔係呀?


雖然有可能會呃我, 不過廿蚊坐下都幾過癮丫


等齊人就開船lu


成船都係後生仔


首先船家會兜我地入去睇下水鄉風情, 影下相









跟住佢就駛出大海, 帶我地睇舊石


就係依舊, 好似叫做「將軍石」定「女皇石」之類
側面睇係好似有個人樣斜望出海


跟住就駛出去在同一個範圍內周圍兜, 但最後也不見海豚的蹤影
兩次睇中華白海豚, 一次在保和島, 一次在大澳, 兩次都睇唔到

坐完船仔, 我地就上岸玩。


大澳山水風味濃, 當然唔少得山水豆腐花啦


大街上有一間大澳文化博物館, 可以讓你認識大澳的歷史






清茶啖飯天過天; 粗衣麻布又一年









即叫即燒 碳燒海鮮乾


行行下...俾我地見到依檔野


佢係度燒咩呢?


魚春呀!


用碳爐即叫即燒, 燒到脆卜卜後, 就剪碎或者成塊用竹簽串住食






魚春有兩款, 大同細o既分別
大大隻字寫住「超好食, 比烏魚子更好食」
上次去高雄旗津漁港冇試到烏魚子, 都唔知係咩味
見隔離個o靚妹買左不停話好香呀, 仲食到津津有味, 我就好想試
不過30蚊好似太貴喎......唔好食點算?


除左魚春, 仲有瀨尿蝦乾﹑大紅蝦乾﹑魷魚乾


最後我地買左沙鑽魚乾, 仲加左少少辣, 好香呀~~



越過橋繼續探索




原塊鯊魚皮...好恐怖呀!


雞泡魚吊飾, 係咪真o既呢...?






大澳好多貓貓, 大部份都很庸懶


依間東京士多好得意, 好似大有來頭咁! 連大澳歷史博物館都好似有介紹過
不過我梗係冇留心睇啦, 所以我唔知, 哈哈


周圍都有好多類似「潮語學習字卡」畫風的立體畫作公仔






好多龜被關在籠裡, 好慘呀






白雪公主同七個小矮人都有? 不過佢個樣好怪架








行到熱辣辣, 坐低食返碗冰涼豆腐花先


個view都唔錯喎~


豆腐花好味




坐係度都幾有feel


新落成的鐵皮屋, 好骨子喎!
不過會唔會好熱呢?




大澳出名「蝦豬餅」, 不過我地冇試


A先生飲緊咩呀? 依枝名為「大澳利賓納」 (原名: 紫貝天葵汁), 係大名鼎鼎o既鮮渴飲品。飲落其實即係山渣汁, 酸酸甜甜好似飲緊酸梅湯咁, 幾開胃。有益過真正利賓納。








行左個零鐘, 我地就行返出去搭車


走o既時候又遇到, 今次買左魚春試!




口感硬硬地, 好乾, 味道鹹鹹地, 係好香, 不過食落唔係真係超好味喎


大澳o既海鮮應該仲新鮮! 下次有機會要試下先~

行到巴士站, 見未有車, 街口有間蘆薈專門店, 買左樽蜜糖蘆薈飲。
蜜糖蘆薈水, 鮮製冇添加, 香港製造。好清甜好好飲, 廿蚊枝好抵!
最衰趕住搭車, 如果唔係想買多枝tim呀!
由於太好飲o既關係, 我地都冇影到相。

((待續......))