雲南之旅感想

去完雲南返o黎已經成個月, 但係都未有時間寫遊記!
今日開始我會慢慢上載相片及遊記了, 請大家耐心等候啦。

首先總結一下旅程o既感受先!
跟團真係好辛苦, 尤其係依d八天團...經過今次之後, 我發誓以後都唔會再跟團!!!
日日都唔夠瞓...趕飛機趕車真係好辛苦...如果我自由行, 我唔會編自己一到步第二朝就坐7點幾機。

昆明﹑大理﹑麗江﹑香格里拉, 四個地方之中...我最喜歡係香格里拉! 因為到處都見到綠油油o既草原, 同自由自在o既野生馬牛羊~ 其次是麗江, 若不是遇上壞天氣, 一定漂亮10倍!! 至於大理, 你會見到好多山間田野, 感覺是舒服的。不過相比起麗江古城, 大理的比較人工化, 若沒有充足時間其實可以不去。昆明, 是一個大城市, 沒有特色, 相信因為九鄉和石林兩個景點才會停這一站吧!

至於天氣呢, 真係唔好彩, 撞o岩雨季, 去到麗江落狗屎......玉龍雪山完全睇唔到, 石卡雪山又唔靚~~幸好香格里拉&昆明放晴, 看到普達措公園及石林靚o既一面。

至於高山症, 好幸運我地全團人都冇事! 係有部份團友有少少頭痛o者~ 我自己都冇乜事! 去到香格里拉仲跑得跳得, 哈~ 係可能感冒關係, 令到我第2日嘔到七彩, 不過之後幾日都冇乜事lu~ 我諗因為行程是慢慢上的關係, 所以大家都適應左。反而去到香格里拉, 見到隔離一團內地團友, 不停嘔吐。

衛生方面, 廁所果然係很有「風味」! 有d廁所沒有門﹑有d廁所臭氣沖天﹑有d廁所沒有水沖廁及洗手......果真大開眼界!!! 很後悔沒有帶口罩, 原來真係可以好臭架。

永安團算是食好住好, 導遊的質素都ok, 不過今次的隨團領隊, 我們就一致認為麻麻地。經驗唔夠, 講野多過做野, 仲成日講廢話......我地唔理佢, 佢仲要自己繼續講~_~ 最差係佢俾我地o既感覺似係「團友」多d, 成日痴住一位單身團友行, 最搞笑係我地問佢野, 佢自己都唔知, 仲亂up; 又問返團友「我地個車牌幾多號呀?」......真係好笑喇, 乜唔係應該我地問返你咩?? 本來我地有諗過投訴, 唔係想趕盡殺絕, 而係唔想下一團受害, 要俾d小懲大戒佢。不過後來都冇做到, 因為過左道氣, 就算啦, 放佢一馬。如果佢有緣睇到依篇野, 希望佢會檢討下自己, 「少說話, 多做事」。